ខេត្តបាត់ដំបង៖ ជនសង្ស័យដែលជាមុខសញ្ញាប្រើប្រាស់កាំភ្លើង AK-47 បាញ់បោះ ទាំងយប់អស់ជាង២០គ្រាប់ រហូតមកដល់ថ្ងៃនេះបានចូលខ្លួនសារភាពនៅ ចំពោះមុខសមត្ថកិច្ច តាមការទាក់ទងលួងលោមរបស់កូនស្រីពៅ។

អធិការនគរបាលស្រុកសំឡូត លោក ម៉ែន រីម បានអោយដឹងថានៅ ព្រឹកថ្ងៃទី១០ ខែធ្នូ ឆ្នាំ២០២១ កម្លាំងជំនាញ បានសហការជាមួយកម្លាំងអន្តរាគមន៍ស្រុក និងកម្លាំងប៉ុស្តិ៍នគរបាលរដ្ឋបាលតាសាញ បាននាំខ្លួនជនសង្ស័យឈ្មោះ សុខ គង់ ភេទប្រុស អាយុ៥៤ឆ្នាំ រស់នៅ ភូមិអូរស្ងួត ឃុំតាសាញ ស្រុកសំឡូត ខេត្តបាត់ដំបង បន្ទាប់ពីតាមប្រម៉ាញ់និងប្រើវិធីសាស្ត្រ លួងលោម អស់ជាច្រើនថ្ងៃ ដើម្បីកសាងសំណុំរឿងចាត់ការតាមផ្លូវច្បាប់។

លោកអធិការបានបន្តថា ក្រោយពីឃាត់ខ្លួនយកមកសាកសួរ នៅ ចំពោះមុខសមត្ថកិច្ចជនសង្ស័យរូបនេះបានសារភាពថា នៅ យប់ថ្ងៃកើតហេតុខ្លួនបានផឹកស្រាអស់ប្រហែល ៥ កំប៉ុង ហើយ នៅ ពេលនោះ ហាក់បីដូចជាកម្រោលចូល ក៏បានស្ទុះទៅ ទាញកាំភ្លើងដែលខ្លួនលាក់ទុកយូរហើយ មកបាញ់ឡើងលើចំនួន ៣ គ្រាប់ បន្ទាប់មកក៏បានប្តូរសោកាំភ្លើងទាញកៃបានតែ២ដងប៉ុណ្ណោះ គ្រាប់ដែលមានក្នុងបង់សរុប ២១គ្រាប់ បានផ្ទុះចេញទាំងអស់តែម្តង ដោយពេលភ្ញាក់ខ្លួនឡើងមានអារម្មណ៍ភ័យពេកក៏រត់គេចូលព្រៃតែម្តង។

គួរបញ្ជាក់ថា កាលពីថ្ងៃទី០៦ ខែធ្នូ ឆ្នាំ២០២១ វេលាម៉ោងប្រហែល២០ និង០០នាទី ជនសង្ស័យបានប្រើកាំភ្លើងAK-47បាញ់ឡើងទៅ លើមេឃចំនួន២១គ្រាប់ ក្រោយមកក៏បានរត់គេចខ្លួនយកទាំងអាវុធទៅ ជាមួយផង ហើយភ្លាមនោះសមត្ថកិច្ចក៏បានទៅ ធ្វើការស្រាវជ្រាវតាមប្រម៉ាញ់រហូតបាននាំយកទៅ សាកសួរនៅ អធិការដ្ឋាននគរបាលស្រុក ហើយក៏កំពុងរៀបចំសំណុំរឿងដើម្បីបញ្ជូនទៅ ការិយាល័យជំនាញខេត្តតាមនីតិវិធីផងដែរ៕